header photo

هميشه ياشيل يارپاق‌لار

July 27, 2017

هميشه ياشيل يارپاق‌لار
صابر نبی‌اوغلو

)بالاش “آذراوغلو”نون “خزان يارپاق‌لاري” آدلي كیتابينا بیر باخیش(
خالق شاعري بالاش آذراوغلونون  2002- جي ايلده اوخوجولارينا تقديم ائتديگي “خزان يارپاقلاري” آدلي كتابينين مطالعه‌سي ذهنيمده جانلانديغي سارسينتي و عذابلار، سئوينج و قايغي‌لار، آيريليق و حسرت، ياراديجيليق فرحي واضطرابلاري ايله دولو اولان بير دونيايا پنجره آچدي. مشاهيده‌‌لريمه اينانماديم و اينانماق ايسته‌مه‌ديگيم معنا ايسه بوندان عبارت اولدو: پوئتيك گولوستانا هميشه ياشيل پوهره‌لر بخش ائده‌ن بير باغبانا خزان ياراشارمي؟
ان بؤيوك حقيقت بوندان عبارتدير: اصيل صنعت اثرلري خزان تانيمير. تزه‌‌ليگيني و طراوتيني هميشه قورويوب ساخلايير. دوغروداندا كيتابين هر صحيفه‌سي اوخوجويا شاعرين اثرلريندن باغلاديغي يئني بير گول چلنگي تؤحفه وئرير. حقيقي ايلهامين محصولو اولان پوئتيك اثرلرخزان تانيسايدي سونراكي نسيل‌لر نظامي، نسيمي، فضولي، صابر كيمي نورو هئچ واخت آزالمايان پوئتيك سياره‌لردن‌ ده خبرسيز قالارديلار.
ايللرين و عصيرلرين سيناغيندان مظفر چيخان، انكار ائديلمز بير منطق‌دير: هرجوره مقايسه قصورلودور. بيز بو كاريفئيلري ياد ائتمكله اونلارا ده‌يرلي صنعت اثري نمونه‌لري يارادان معاصيريميزين ياراديجيليغي آراسيندا برابرليك اشاره‌سي قويماق نيتيندن چوخ اوزاغيق، اما بوتون دوره‌لرده ادبي استعدادين بير آدي اولموشدور: صنعتكار.
من درين اينام حيسي‌ايله دئيه‌رديم كي آذربايجانين خالق شاعري بالاش اذراوغلو  ییرمینجی عصر گونئي پوئزياسي‌نين ان استعدادلي و تكرار اولونماز صنعتكارلاريندان بيري‌دير. اونا بو زيروه ده مووقع قازانديران باشليجا عامل قلميندن سوزولوب گلن حقيقي صنعت اثرلري نمونه‌لري اولموشدور. ماياسيني آذربايجانين چوخ عصيرليك بديعي تفككوروندن آلان، هميشه‌ده معاصير سسله‌نن پوئتيك اينجيلردن.
اعتراف ائديم كي ايلك صحيفه‌سينين قدرتلي ناشر و عوضسيز ادبيات صرافي آذربايجانين خالق يازيچيسي “مهدي حسين‌ين” شاعر آذراوغلويا آچيق مكتوبو ايله آچيلماسي منيم اوره‌ييمدن خبر وئردي. چونكي مكتوبون سطيرلري آذراوغلو ياراديجيليغينا بسله‌ديگيم موناسيبته اوستاد‌هاوادارليغي كيمي سسله‌نيردي. اديب اؤزونون گونئيلي همكارينين صنعتينه موناسيبتينده نه قدرده اوبيكتيو عدالتلي و اوستادير.
مكتوب موعلليفي‌نین بعضي مولاحيظه‌لرينه نظر يئتيره‌ك: “سن وطن و خالق موضوعسونو دؤوروموزون يئني حاديثه‌لري ايله سيخ علاقه‌لنديريب معاصير اوخوجونودا اؤزون قده‌ر هيجانلانديرماغا موفق اولموسان. درين صميميت واحتراص سنين باشقا اثرلرين كيمي بو شعرده ان چوخ نظري جلب ائده‌ن بيرخصوصيتدير.
بير جهتي وورغوايله خاطيرلاماغينا ده‌ير. حتا اوستا آتيجيلاريندا هميشه هدفي وورا بيلديكلريني ادعا ائتمك ناشيليق اولاردي. اگر هر نيشانچي‌نين آتشي هدفه ديسئيدي، اوندا ايسنايپرلرين قدير- قيمتي اولمازدي. خاطيرلاديغيميز بو جهت قودرتلي يازيچينين آذراوغلو صنعتيني بير صراف دقيقليگي ايله قيمتلنديرمك هنري ايله علاقه‌داردير.
آچيق مكتوبون بو سطيرلرينده يووالانان فيكرين درينليگينه و اوره‌ك يانغيسي‌نين حرارتينه ديققت ائده‌ك.
سنين شعرينده سرراست آتشه برابر توتولا بيله‌جك و كسرلي پارچالارين سايي آز دئييلدير. خالق طالعيني موباريز و رمانتيك بير ايلهاملا ترنم ائده‌ن بير- بيريميزين اوره‌ييميزده قدرتلي عكس- صدا دوغوران پارچالارين سايي آز دئييلدي.
اوستادين هئچ بير ايضاح و تقديمه احتياجي اولمايان بو سطيرلرينين مقاله‌نين متني داخيلينده ايري قارا حریفلرله ييغيلماسيني ايسترديم :
من دئيه‌رديم كي سنين بو ميصراعلارين سياسي بير ادعاني قاباريق وئرديگي قدرده سياسي ليريكاميزين استيقامتيني تعيين ائدير:
ايندي ائله اوغول ايسته‌يير وطن
او ستارخان اوره‌كلي
خياباني نفسلي
معجز نييتلي اولسون
آذراوغلونون “خزان يارپاقلاري” آدلي شعرلرتوپلوسوندان سؤز آچيب دا بير ذكا صاحيبي نين قولاقلاردا بؤيوك حقيقتين جارجيسي كيمي سسله نن آشاغيداكي سطيرلرين يانيندان سوكوتلا كئچمك دوغرو اولمازدي. همين سطيرلر آنار موعلليمين قلمينه منسوبدور:
“…
گنجليك ايللريني اردبيلده ياشاميش جنوبي آذربايجان ميللي آزادليق حركاتينين فعال اشتراكچيسي اولموش آذربايجانين- محض آذربايجانين تك بير شمالي آذربايجانين دئييل- خالق شاعري بالاش آذراوغلو گونئيلي- قوزئيلي ادبياتيميزين گؤركملي چاغداش نماينده‌سي، آغ  ساققاليدير.
كيتاب دا توپلانان اثرلر، شاعرين 64- ايلليك يارادیجيليق يوللاريندا ياراتديغي پوئتيك اينجيلردن نمونه‌لردير. ايلك شعرين دوغوم تاريخي 1937- جي ايل قئيد اولونور. ان گنج اثر ايسه بو ايل ايكي ياشينا قدم قويدو. شعرلرين‌هانسي پرينسيپله سئچيلديكلري باره ده كيتابدا سؤز آچيلمير. آمما بوراسي موباحيثه‌سيزدير كي، بو قلم محصوللارينين هر بيرينده موعلليفين ياراديجيليغينين معين چالارلاري بير قيغيلجيم كيمي چاخير، بير يئره توپلانديقدا ايسه شاعرين پوئتيك دونياسينين ا بدي نورلو سياره‌سينه چئوريلير.
اذراوغلو هله قلم محصوللاريندان ميصراعلاريني پوئتيك دونياسينين اورواتلي ائلچي‌لري اولماسينا قايغي ايله ياناشماسيدير. او گؤزه‌ل بيليركي،  پوئتيك ايفاده گؤزه‌لليگيندن محروم اولان شعر دينله‌ييجي‌نين ديققتيني جلب ائتسه‌ده، اونون محبتيني قازانا بيلمز. موعلليفين 1938- جي ايلده يازديغي ” خزر، آي خزر”  شعريندن آلديغيميز ميصراعلارين پوئتيك گؤزه‌لليگيني جاذبه قووه‌سيني ايلك قلم سيناغي اوچون اوغورلو حساب ائتمك يقين كي، موباليغه كيمي تلقي ائديلمزدي.
سن گؤي گؤزلو ملك‌سن
دوماندان اؤرپه‌يين وار
گؤيرچين لپه‌لردن
قيرچينلي كؤينه‌يين وار.
طبيعي كي، “گوي گؤزلو ملك” ، “دوماندان يارانان اؤرپك” ، “گويرچين قانادلي لپه”،”قيرچينلي كؤينك”  ائپيتتلرينين اوغورلو حساب ائتمك هئچ ده يانليش اولمازدي.
لاكين خالق حركاتينين قوينوندا كئچدييي اجتيماعي حياتين وئردييي درس چوخ قيسا مدت ده شاعيرين ميصراعلارينا دؤيوش و موباريزه احوال – روحيه سيندن قاناد تاخير. آذراوغلونون 1941- جي ايلده قلمه آلديغي “انقلاب شاعيریم” شعرينين ميصراعلاري تكجه اونون صنعتي اوچون دئييل، گونئي ده يارانان انقلابي – دموكراتيك پوئزيانين يئني اوفوقلر فتح ائتمه‌سي اوچون قارتال قانادلارينا چئوريلير. بو شعر دؤورون پوئزياسينين انقلابي احوال روحيه‌سيني و دؤيوش عزميني ايفاده ائده‌ن مانيفيست ايدي.
من نه شاه، من نه سولطان، نه ياراشيق، نه زينت
نه افسانه، نه ملك، نه ساراي، نه سلطنت
نه قديم عصيرلري يادا ساليب آغلايان
نه پيمانه، نه ساقي، نه شراب شاعري‌یم
آزادليغين جارچيسي انقلاب شاعري‌یم
ياراديجيليغي‌نين ايلك دؤورونه بو ميصراعلارين بلدچيليگي ايله باشلايان پوئتيك كاروانين كئچديگي منزيل‌لرده شاعرين گؤسترديگي هنر حيرت دوغوراجاق قده‌ر اوغورلو اولموشدور. سونرالار ايشيق اوزو گؤره‌ن “فيل”،” قيزيل باليق “،”زانباق”،”شاهين و كورامال”،”تاجر و مجنون ” قبيله‌دن اولان فلسفي آخارلي شعرلرينين صنعتكاري داها اوغورلو نتيجه‌لره گتيريب چيخاراجاغينا شوبهه ائتمه‌يه يئر قويموردو.  من يوخاري دا حاققيندا باشقا موناسيبتلرله سؤز آچديغيم ” ائله اوغول ايسته‌يير وطن …” اثريني محض بو آختاريشلارين پوئتيك تاپينتيسي حساب ائدرديم. بو نادر پوئتيك كشفين هر ميصراعسيني جمعيتين اجتيماعي- سياسي حياتينين پروبلملري‌نين بديعي حلليني وئره‌ن ادبي حكم كيمي قيمتلنديرمك اولار:
قانونو كمنده ائيله‌مك
عبث‌دير
فيلسوف اولسان دا
بيليرسن بونو
جمعيتين ان بؤيوك قانونو
ازادليق‌دير
مين ايللردن بري انسان اوغلو بشرين ياراتديغي معجزه لردن بيري اولان شعر عالمي‌نین يولچوسو اولسادا، بو هئچدن يارانان، فقط، دوغوش ايله موجودلوغا چئوريلن شعرين سيرلرينين و ايمكانلارينين آخيرا قده‌ر آچيلديغيني ادعا ائتمه‌يه گيريشن جسارت صاحيبي تاپيلماييبدير. هر صنعتكار بو سيررين آچيلماسينا امكاني داخيلينده وئردييي هديه‌سي ايله شهرت قازانميشدير. آذراوغلونون “خزان يارپاقلاري” كيتابيندا وارليغي بئله جؤهردن يوغرولموش اينجي‌لر آز دئييلدير. بو شعرلرينده صنعتكارين بيرجه فاكتين سيماسيندا كشف ائتدييي معنا يوكونون اوخوجونون درين دوشونجه‌لره دالديراجاق نمونه‌لر چوخدور. قدرتلي اوچوش قانادلارينا ماليك اولان شاعرين بديعي تفككورو نهنگ بير فيلين بير تيكه قند اوچون گؤستردييي مطیعلیگین سيماسيندا انساني درين تفككور عالمينه دالديران، اسير ائديلن بير قيزيل باليغين قورتولوش حسرتي، بشرين ان بؤيوك نعمت حساب ائتدييي آزادليغين سوراغينا آپارير، گلدانا قويولان بير زنبق گولونون سيماسيندا طبيعي گؤزه‌لليگين عولويتي سمالارينا اوچوردور.
من موعلليفين “تاجر و مجنون ” شعری باره ده سؤز آچماق ايستركن دفعه‌لرله ائشيتديگيم و هميشه ده ديققتله قارشيلاديغيم بير ادعانين درينليگينه، معنا عالمينه سانكي يئني‌دن يول تاپديم. انسان تفككورو بعضا ائله دؤشونجه‌لرين اويلاغينا چئوريلير كي، اونلار باره ده يالنيز پوئزيانين ديلي ايله سؤز آچماق اولار. منه ائله گلير كي، سئوگي محبت دئييلن مقدس انساني حيسسه، عمومي شكيلده انسان آدي داشييان، لاكين فردي‌ليك ده بير- بيريندن يئردن گؤيه قده‌ر فرقلي اولان بشر اؤولادينين موناسيبتي اوخشارسيزدير. “تاجر ومجنون” اثرينده بو ازلي و ابدي پروبلئمين حللي ايله علاقه‌دار شاعرين چوخ اؤره‌يه ياتيملي رايي واردير.
بير تاجر كارواني اؤتوب كئچدييي صحرادا ايستيراحته دايانديغي بولاغين باشيندا اورايا ياناشان مجنون و يانينداكي جيراني گؤروب اونا دئيير.
سن گل او جيراني باغيشلا منه،
اوچ قيزيل وئره‌رم اونون يئرينه.
لاكين شاعرین ترنمونده تاريخ بويو بشر اؤولادينين بعضيلرينين يول يولداشي اولان موحتكيرليك خيصلتي ايكي نفر آراسيندا محدودلاشيب قالمير. شاعر بلكه ده بو اؤلوملو- ايتيملي دونيادا هر آدديمدا راست گلدييي بير عبرت‌آميز فاكتين سيماسيندا بؤيوك حقيقت‌لر آچير. ثروت و پول حسابينا بوتون بشري نعمتلري آلا بيله‌جه‌ييني دوشونن انسانجيقلارين داخيلي مسكينليكلريني و كورلوقلاريني ايفشا ائدير. ميصراعلارين آتش آخينلي،  ياخيب – يانديريجي منطيقينه ديققت ائده‌ك:
نه اولسون او ضعيف، سن قووتلي سن
گوجون چاتانلاري محو ائده‌نده سن-
اوندا جاناوارلا سن‌ده نه فرق وار؟
شاعيرين وطن سئوگيسي، بشري دويغولارينا قول- قاناد وئره‌ن دوغما ديارا محبتي “تبريزيم منيم” ، پاك و داغ چايلاري قده‌ر دوم- دورو و شفاف سولو سئوگيسي “شيرين، فرهاد و خسرو شاه”، خميره‌سي وطنين فيلسوف قابيليتلي، مدريك باخيشلي اؤولادلارينا اؤره‌ك يانغيسيندان يوغرولان “كئفلي اسكندر” آدلي شعرلرينده  اؤزلرينين دولغون بديعي عكسيني تاپميشلار.
آذراوغلو و اونون ادبي جبهه‌سينه منسوب اولان شاعيرلرين آنا محبتي، وطن سئوگيسي قده‌ر مقدس توتدوقلاري موضوعلاردان بيري آناديلي‌دير. بوتون دؤورلرده دوغما آنا ديلينين تضييق و سيخينتيلارا معروض قالماسي بو موضوعيا موناسيبتي معينلشديره‌ن باشليجا عاميل اولموشدور. آنا ديلينه حصر ائديلن اثرلرده حاكيم دايره‌لري حرارتي سنگيله‌ين بير اعتراض واردير.
آذراوغلونون آناديلي شعرينين ده اؤز آهنگي و اؤز نفسي واردير.
هئچ ده بو هده- قورخو قارشيسيندا دوغما آنا ديليني مودافيعه ائتمك‌ده آياق گئري قويمايان وطن  اوغلو جللادين:
دئديلر: – ديليني قوپارداريق بيز دانيشا بيلمزسن – هده‌سي قارشيسيندا سارسيلماق حددينه چاتير؛
سوسدو قهرمان
نه ياشارام دئدي –  نه اؤللم – دئدي.
عومرونون آهيلليق چاغلاريني ياشايان شاعيرین پوئتيك نفسينده حاكيم اولان گنجليك احتراصي و حياتا سئوگي سؤزون اصل معناسيندا اوخوجودا خوش نيتلي حسد حيس‌لري دوغورور. بو باخيمدان “شكلينه باخيرام ” ،”دنيز اولماق ايسته ييرم ” ،”سككيزدن سكسه‌نه ” ، “مدينه گولگون ” شعرلرينين اؤتدوكلري ماهنيلارين اوخوجو كؤكسونده اوياتديغي دويغونو بئله ايفاده ائتمك داها اويارلي اولاردي.  – شاعر سنين صنعت گولوستاني‌نين خزان يارپاقلاري دا گنجليك طراوتيني قورويوب ساخلاميشدير.  بئله تر چيچك‌لر چلنگينه هميشه ياشيل يارپاقلار عنواني چوخ ياراشاردي.

بيرگون اسير دوشموش بير قهرمانی،

سورغويا، سوالا چکنده جللاد
سيزين الينيزده اؤلمرم! - دئدي، 
مني زامان- زامان ياشادار حيات
دئديلر: - گؤزونو اوياريق سنين، 
گؤره بيلمزسن
دئدي: - ياشارام
دئديلر: - قولونو قيراريق سنين، 
سيلاحين، کسرين دوشر اليندن
دئدي: - ياشارام
دئديلر: - قيچينا کونده ووراريق، 
گزه بيلمزسن
باشيندا ائله بير تونقال قالاريق 
دؤزه بيلمزسن
دئدي: - ياشارام
دئديلر: - نيين وار آپاراريق بيز، 
بير ده کئچميشينه دؤنه بيلمزسن
دئدي: - ياشارام
دئديلر: - ديليني قوپاراريق بيز، 
دانيشا بيلمزسن، دينه بيلمزسن
سوسدو قهرمان، 
نه ياشارام دئدي، نه اؤللم دئدي
سؤيله دي: - نه بيلسن ائله، ائي جللاد
ديوان سنيندير، 
دؤوران سنيندير… 

Go Back

Comment