header photo

من فریدون ابراهیمی

May 19, 2017

 

من فریدون ابراهیمی آدینی،

 فامیلی سینی داشی ­ییرام شرفلی ارث

من، عمیم فریدون ابراهیمینین آدینی، فامیلی سینی داشی­ ییرام. بو اسمی منه آتام - حق، عدالت اوغروندا مبارز- انوشیروان غنی اوغلو وئریب. گؤزومو دونیایا آچاندان ائویمیزده زنگین کتابخانا، قالاق-قالاق قزئتلر، ژورناللار گؤرموشم. آتام آغلیم کسندن بابامدان - غنی کیشیدن ده دانیشیب، اما عمیم باره‌ ده صحبتلری بیتیب-توکنمه‌­ییب. اوندا بیلمیشم کی، خالقیمیزین شرف سالنامه­‌سینی یارادانلار سیراسیندا اولان بیر نسله منسوبام.

حقوقشناس پئشه‌­سینی سئچمه­یمین سببی ده ایلک نؤوبه­‌ده والیدئینلریم اولوب. اونلار منه فریدون ابراهیمینین نظرلری ایله باخیبلار. سونرالار ادبیاتدان، فیلملردن بو ساحه­‌نین حرفه ای، مرد، یئنیلمز سیمالاری ایله تانیش اولاندا گلجه­ییمی حقوقشناسلیقلا باغلاماغی قطعیله­شدیرمیشم. باکی دولت دانشگاهینی بیتیریب آذربایجانین دادستان لیق  اورقانلاریندا چالیشدیغیم ۳۷ ایلین هر گونونده ائله سانمیشام کی، فریدون و انوشیروان ابراهیمیلر باشیمین اوزه­رینده دایانیب نظارت ائدیرلر. اونلارا هر گون وجدانی گزاریشیمی وئرمیشم. اؤتن مدتده نه واختسا رهبرلیک طرفیندن تنبیه اولونما، جزالاندیرما حاللاری ایله اوزلَشمه­میشم. دفعه‌­لرله باش دادستان لیغین  تعریف نامه­‌لری، قیمتلی هدیه‌­لری ایله پاداش لاندیریلمیشام. بو سیستمده اَن نفوذلو حساب ائدیلن آذربایجان جمهوری سی دادستان لیق اورقانلارینین فخرلی همکار لَقَبینه و دؤش نیشانینا لاییق گؤرولمؤشم. حاضردا بازنشسته اولدوقوم بیر وقت ده ایچریمدن تسللی تاپیرام کی، من اونلارین روحو قارشیسیندا بورجلو قالمامیشام.

بونلار اؤز یئرینده. یازیدان مقصدیم هئچ ده کیمه‌­سه­یه گزارش وئرمک دئییل. ساده‌­جه فریدون ابراهیمی باره ‌ده مأخذلره، فکرلره، چاتان سؤزلره استناد ائدیب هر بیر آذربایجانلی­نین، حقوقشناسین اوندان نیه نومونه گؤتوره جیینه قیساجا آیدینلیق گتیرمک ایستییرم.

آذربایجان ملی حکومتی آنجاق بیر ایل عؤمؤر سوروب. اما اونون بوتون شرق خالقلارینا هر ساحه­ده نمونه اولا بیله‌­جک قانونلار مجموعه سینین مضمونونا، دولغونلوغونا گؤره، ان اساسی جمعیتده یاشیندان، وظیفه ‌سیندن، ملیت یندن آسیلی اولمایاراق هر بیر شخصین حقوق و دمکراتیک آزادلیقلارینی اساس گؤتورمه­سی ایله یادداشلاردا قالیب. همین قانونلار انسان منافعیینه، شرف و لیاقتینین قورونماسینا، رفاه حالینین یاخشیلاشدیریلماسینا، ایش و اجتماعی فایدالی زحمتین تأمیناتینا، وطنین اقتصادی ترققی­سینه یؤنه­لن هر جور خصوصی ملکیت حقوقونون مدافعه‌­سینه استقامتله­نمیشدی.

ملی حکومتین جیلد- جیلد حقوقی خزینه سی هم ده سید جعفر پیشه وری­نین رهبرلیگی آلتیندا چالیشانلارین، خصوصیله حقوقشناسلارین بونلاری حاصیله گتیرمک اوچون نئجه رغبت له، گرگین ایشلدیکلرینی، بوتون بیلیک و باجاریقلارینی یئنی جمعیتین انکشافینا، محکملندیریلمه‌­سینه صرف ائتدیکلرینی گؤسترمک ده‌دیر. فریدون ابراهیمی «آذربایجان» قزئتینده یازیردی کی، بیز هامیمیز آذربایجان ملی حکومتینین یئنی دؤورده بیزیم اوچون یاراتمیش اولدوغو یئنی اجتماعی، اقتصادی، سیاسی شرایط‌دن لیاقتله استفاده ائدیب، اؤز باجاریغیمیزی نیشان وئرمه­لی­ییک. بوندان سونرا قانونو پوزان و خالقین حقوقونا تجاوز ائد‌ن هر بیر شخص اَن آغیر و رحم سیز صورتده جزالاناجاقدیر...

فریدون ابراهیمی اؤزؤ زنداندا اولارکن یوزلرله گناه­سیز انسانین آمانسیزجاسینا جزالاندیریلدیغینی گؤرموشدو. اؤزؤنو مدافعه ائد‌ن محبوسلارین ۱۰۰ نفریندن چوخونون دؤرد ایل عرضینده محکمه قراری اولمادان حبسده قالدیغینی مشاهیده ائتمیشدی. ملی حکومتین باش دادستانی تعیین ائدیلن کیمی اونلارین هامیسی آزادلیغا چیخدی. بئله‌­لیکله ده بوتون یاغلی وعده لری رد ائد‌رک قانونون و شخصیتین عالی­لی­ینی عیانی صورتده گؤسترمیشدی.

او واخت اکثریتین گومانینا بئله گلمزدی کی، دؤردونجو استان-ین باشچیسی، اورومیه ‌ده ‌کی  هنگ-ین فرماندهی، کسدیگی باشلارا گؤره هئچ وقت سورغو-سوالا توتولمایان سرهنگ احمد زنگنه باره‌سینده کیمسه اؤلوم حکمی ورمه یه جسارت ائده بیلر. باش دادستان ایسه جنایتکارین خواهشینه گلن لره محکم شکیلده بیلدیرمیشدی کی، آغیر سلاح لار، تانک لار واسطه‌­سی ایله قوجالاری، اوشاقلاری، غیرمسلح انسانلاری آمانسیزجاسینا اؤلدورَ‌ن شخصین حیاتدا یاشاماغا حقی یوخدور. «چونکی بیز خالقین طالعی ایله احتکار ائد‌ن آلیش- وئریشچیلر دئییلیک، اونون آزادلیغی یولوندا مبارزه­‌یه قالخمیش سربازلاریق. اؤلوم بیزی قورخوتمؤر».

بلی، او، آذربایجان ملی مجلسینین و ملی حکومتینین، خالقین مالینی، جانینی، امنیتینی، آزادلیغینی خالق دوشمنلریندن قورویوب ساخلاماق حقینده­کی عدالتلی قانونلارین حقیقی مدافعه‌­چیسی ایدی.

فریدون ابراهیمی،

«ایرانلی مهاجرلر جمعیتی» اجتماعی بیرلیگی صدرینین بیرینجی معاوینی

Go Back

Comment