header photo

ایران اسلام شورا مجلیسی تورپاق اصلاحاتی حاقیندا رولو

November 12, 2017

ایران اسلام شورا مجلیسی تورپاق اصلاحاتی حاقیندا رولو

(۱۹۷۹-۱۹۸۲-جی ایللر)

 سلطانعلی میرزه‌زاده

۳ - جی هیسه

تورپاق اصلاحاتی قانونونون ماده‌لرینین، نه اینکی اسلام قانونلاری، هم ده حدودی جهتدن دوزگون و عدالتلی اولدوغونو هم کومیسسییا عضولری، هم ده حیاتی رئاللیقلار تصدیق ائتمیشدیر. مثلاً، کومیسسییانین عضولریندن بیری اولان آیت الله مئشکینی «کئیهان» قزئتی موخبیرینین سواللارینا جاوابیندا گؤستریردی کی؛ «... مولکی، حقوقی و دیگر برابرسیزلیکلر بیر- بیرینه ظلم، زوراکیلیق و استثمار نتیجه سینده، عمله گلمیشدیر. او، داها سونرا اؤز فیکرینی بئله داوام ائتمیشدیر.»... اصلینده، اسلام مولکیت حقوقوندا غیری- محدود مولکیت صاحبلیگی رد ائدیلیر، چونکی مولکیت نه روحی و نه ده معنوی قیدا دئییل کی، ایسته دیگین قدر اونا صاحب اولاسان. اگر هر هانسی بیر مولکیت باشقاسینین حسابینا یارانیب آرتیرسا، او جمعیت اوچون فساد منبعیدیر. تورپاق عمومی نعمتدیر. اوندان هامی، خصوصاً اونا زحمت چکن بهره‌له نملیدیر».(۱۹) بوندان علاوه، ایران جمعیتی اوچون حیاتی اهمیته مالیک اولان آقرار- کندلی مسئله ‌سینین حلینه عائید خمئی­نینین «اگر تورپاق مسئله ‌سی حل اولماسا، انقلابین بیر پایه‌ سی ناقصدیر»(۲۰) سؤزونه ایستیناد ائد‌ن اورومیه انقلاب کئشیکچیلرینین باشچیسی دئمیش‌دیر: « فئوداللارین نه اینکی تورپاغی، حتی دیگر املاکی دا مصادره اولونمالیدیر». ائلجه ده، حجت الاسلام مهدی کروبی تورپاق مسئله ‌سینین عدالتله حلینی ایره ‌لی سوره ره ک حاقلی اولاراق دئمیشدیر: «تورپاغین ۱۰۰ هئکتارلارلا بیر نفرین الینده توپلانماسی دوز دئییلدیر. کندلینین گئجه- گوندوز ایشله مه ‌سی و الینه هئچ نه گلمه‌ سی دوز دئییلدیر. طبیعیدیر کی، بو وضعیت بو شکیلده داوام ائده بیلمز».(۲۱)

فکریمیزجه بوتون بو دئییلنلر آقرار اصلاحاتی تدبیرلرینی پوزماغا چالیشانلارا، کلی مقدار تورپاغی اللرینده جمعلشدیر‌نلره حق قازاندیرماق ایسته ‌ینلره توتارلی و منطیقی جاوابدیر.

دئییلنلره باخمایاراق، تورپاق صاحبلری قانونون «ج» و «د» بندلرینین اجراسینی کمونیست تدبیری آدلاندیریب، مختلف بهانه و اویدورمالارا ال آتدیلار. تورپاق اصلاحاتینین کئچیریلمه‌ سینه آز- چوخ راضیلیق وئره‌ن رهبر شخصلری سول مسلکلی قوه‌لرین تأثیری آلتینا دوشمک‌ده، دین و اسلامدان، قرآنی شریفدن و بوتون شریعت قانونلاریندان اوز دؤندرمکده اتهام ائتدیلر. مثلاً، گلپایگانی، تهرانی کیمی روحانیلر و دیگر تورپاق صاحبلری اصلاحاتین علیهینه چیخماقلا اونو غیری- قانونی حساب ائتدیلر. حتی تام صورتده اصلاحات کئچیریلمه‌سی گمان ائدیلدیگی تقدیرده روحانیلر کفن گئییب کوچه ‌یه چیخماقلا تهدیدی اصوللارا دا ال آتماقدان چکینمه ‌دیلر.

«ج» و «د» بندلری اطرافیندا مبا‌حثه و مبارزه او مرحله‌ یه گلیب چاتدی کی، بو مسئله نین دینی جهتدن دوزگون اولوب-اولماماسینی بیر داها دقیقلشدیرمک اوچون خمئی­نینین گؤستریشی ایله کومیسسییا یارادیلدی. همین کومیسسییا تورپاق اصلاحاتی قانونو و اونون بوتون مادده‌لرینی شریعتین مولکیته عائید مدعالاری ایله توتوشدورولوب، مقایسه ائتدیکدن سونرا، تورپاق اصلاحاتینین و اونون بوتون مادده‌لرینین، نه اینکی اسلام قایدا- قانونلارینا اویغون اولماسینی، هم ده حقوقی جهتدن تام دوزگون اولدوغونو بیر داها تصدیق ائتمیشلر.

اونا گؤره ده، بوتون ایران کندلیلری حاقلی اولاراق تورپاق مسئله‌سینین عدالتلی صورتده حل ائدیلمه‌سینی، کندده فئودالیزم و مولکدارلیق ظلمونه تامامیله سون قویولماسینی، ارتیجاعنین کندده‌کی اقتصادی و سیاسی دایاقلارینین کؤکوندن کسیلمه ‌سینی ایستییرلر. کندلیلرین بو کیمی طلبلری نتیجه ‌سینده تورپاق، تورپاق اصلاحاتی حاقیندا، نهایت، ۱۹۸۲- جی ایلین مارتیندا مجلسده قیزغین مباحثه دن سونرا، قانون لایحه‌سی قبول ائدیلدی و بیه نیلمک اوچون نظارت شوراسینا وئریلدی. لاکن مجلسین آقرار اصلاحات حاقینداکی قانون لاییحه‌سی ایندیه دک حیاتا کئچیریلمه‌ییب، هله ده کاغیذ اوزرینده قالماقدادیر. بونون اساس سببی ایسه اوندان عبارتدیر کی، بو قانونون اجراسی کلی میقداردا تورپاق ساحه‌لرینی اؤز اللرینده توپلامیش مولکدار روحانیلرین منافعیینه توخونور. اونا گؤره ده، تصادفی دئییلدیر کی، مجلسین قانون وئریجیلیک فعالیتینی تامامیله اؤز نظارتی آلتینا آلمیش نظارت شوراسی قانون لاییحه‌سینی «تکمیللشدیرمک» بهانه‌سیله دفعه‌لرله مجلسه قایتارمیش و مجلس طرفیندن ایری تورپاق صاحبلیینه عائید بعضی مهم و واجیب مادده‌لر اوندان چیخاریلاراق قیصادیلمیش واریانتدا یئنیدن نظارت شوراسینین تصدیقینه وئریلمه‌سینه باخمایاراق همین شوراداکی محافظه کار روحانیلر یئنه ده قانع اولماییب، اونون اسلام احکاملارینا ضد گلدیی، «مقدس» خصوصی مولکیت پرینسیپینی پوزدوغو اوچون قبول ائتمه ‌یرک اجراسینی دایاندیرماغی قرارا آلدی و بو قرار خمئینی طرفیندن بیه نیلدی. (۲۲) باخمایاراق کی، خمئینی خلقین گؤزوندن پرده آسماق اوچون بیر نؤع اوزاق گؤره‌نلیک کیمی، گؤرونن فکری یئنه ده تکرار ائد‌رک بیلدیمیشدیر کی، اؤلکه ‌نین عالی قانون وئریجیلیک- حاکمیت اورقانی مجلسیدیر، بیلاواسیته او مجلس طرفیندن بیه نیلمیش قانون لاییحه‌سینین قبول ائدیلمه‌سی مسئله‌سینی حل ائتمه‌لیدیر. (۲۳)

بونونلا علاقدار دئپوتات کاظیم نوروزی حاقلی اولاراق مجلسده‌کی چیخیشیندا انقلاب عرفه‌سینده کندلیلره وئریلمیش وعدلری خاطرلاداراق دئمیشدیر کی، «امام» (۲۴) هله فرانسادا اولارکن بویورموشدور کی، «بیز» فئوداللارین طرفداری دئییلیک. ملکدار و فئوداللارین زور گوجونه اله کئچیردیکلری تورپاقلاری اونلاردان آلیب محروم و مستمضعف اختیاریندا قویماق لازیمدیر». ایندی هامی بو انتظاردادیر کی، محروملاردان طرفدارلیق ائد‌ن بیز اونلارین خئیرینه نه ایش گؤرموشوک و نه ایش گؤرمک ایستییریک». (۲۵) خمئی­نینین ادعالاریندان بئله چیخیر کی، تورپاق تامامیله کندلیلرین الینده اولمالی ایدی. حتی اصلاحات قانونونون حیاتا کئچیریلمه‌سیله علاقدار ۱۹۸۲-جی ایلین نویابر آییندا ناظرلر شوراسی طرفیندن ۵ ایل مدتینه «تورپاق اصلاحاتی ناظرلیگی» یارادیلماسی حاقیندا قبول ائدیلن قرارلار دا هئچ بیر شئی ده ییشمه‌دی. (۲۶) دئییلدگی کیمی، اوللر تورپاق اصلاحاتی حاقیندا روحانیت طرفیندن تک- تک مثبت فکرلره راست گلمک اولوردوسا، ایندی بو مسئله مختلف بهانه ‌لرله کنارا آتیلیب، اونون قویولوشو تامامیله الهی قوه‌یه استناد ائدیلره ک مولکیتین توخونولمازلیغی مسئله‌سی اورتایا آتیلیر. (۲۷) تضادلی فکرلر و ضدیتلی ملاحیظه‌لره آشیلانمیش بئله بیر ادعا ایر‌لی سورولور کی، اسلام عنعنه‌سینه گؤره، یئر و یئرده اولان بوتون ثروت (مال- دؤولت) حاق طالعی، یعنی الله مخصوصدور. بو ثروتی، گویا آداملارا اونا گؤره وئریب کی، اوندان موقتی حالدا استفاده ائتسینلر، الله مولکیت تانیمیر. بو باخیم‌دان ایران ایسلام رئسپوبلیک‌سیندا مولکیت فورمالارینین معین ائدیلمه‌سی و خصوصی مولکیتین اعلان اولونماسی اسلام عنعنه‌چیلری طرفیندن «فخری و مقدس» ایش کیمی معین درجه ‌ده «گذشته گئتمه» حساب ائدیلیر کی، بو دا، حقیقتده، اونلارین دینی احکاملارین معاصر حیات شرایطینه اویغونلاشدیرماق جهددن ساوایی، بیر شئی دئییلدیر. عمومیتله، اسلامدا مولکیت مسئله‌ سی اورتایا چیخا‌دا دینه مراجعت ائدیلرکن الله واحید معیار گؤتورولور و الله دونیادا بوتون ثروتلرین یئگانه صاحبی حساب ائدیلیر. بورادا بیر طرفدن بئله چیخیر کی، هئچ بیر کس مولکیته ییه ‌لنمک ادعاسیندا اولا بیلمز، دیگر طرفدن ایسه هامی ثروتین ثمر‌لی استفاده ائدیلمه‌سینده برابر حقوقا مالیک توتولور، صنفی فرقلرین تسوییه ائدیلمه‌سی طلب اولونور. اسلام اقتصادی سیستئمینین مقصدی، گویا برابرلیک جمعیتی قورماقدیر. بئله بیر فکر خمئی­نینین هله انقلابدان قاباق ایر‌لی سوردویو ملاحیظه‌یه ده سجییه ‌لنیر. او دئییردی کی، هامینین و هر بیر طرفین سرا‌نجامینا وئریله‌جک. (۲۸) بورادان بئله چیخیر کی، انقلابین غلبه ‌سیندن سونرا، هامی املاکدان برابر صورتده استفاده ائد‌جکدیر. هم ده اعلان ائدیلیردی کی، خصوصی مولکیت شخصی امگه اساسلانمالیدیر. اگر مولکیت صرف اولونموش شخصی امه گین نتیجه‌ سی دئییلسه، اوندا، او جمعیته و یاخود دؤولته مخصوص ائدیلمه‌لیدیر. لاکن رئاللیقدا، عملده ایسه بئله اولمالی. عکسینه، ایندی انقلابین باشلانغیجیندا سئچیلمیش اولان شعارلار، گویا «اسلام» دئییلدیر کیمی قله‌ مه وئریلیر، تورپاق اصلاحاتینین یئرلرده حیاتا کئچیریلمه‌سیله علاقدار فعاللیق گؤسترمیش کندلیلر، کند انجمه‌ نی نماینده‌لری تعقیب اولونور، مختلف بهانه ‌لرله حبسه آلینیر و اشگنجه ‌لره معروض قالیرلار. فئودال و مولکدارلارین کندلیلره قارشی قیصاصچیلیق ایشینه انقلاب کئشیکچیلری و انضباطی اورقان مأمورلاری کؤمک ائدیرلر. (۲۹) واختیله حاکمیت اورقانلاری طرفیندن میللیلشدیریلمیش و مصادره ائدیلمیش شخصی تورپاق ساحه ‌لرینی و دیگر مولک صاحبلرینین املاکینی – حتی انقلابا ضد اولدوقلاری تقدیرده بئله قرآنا-اسلام احکاملارینا (گویا امکله قازانیلمیش املاکا دیمک حرامدیر) استناد ائدیلره ک تدریجن اؤز صاحبلرینه قایتاریلیر. باشقا سؤزله دئسک، بورادا بئله تعبیر ایر‌لی سورولور کی، گویا مولکدارلارین «امکله قازاندیغی» املاکا ده یمک حرامدیر. حالبوکی، بیر طرفدن قرآنین موافیق مددعالارینا اساساً، دئییلیر کی، لازم گلدیکده دؤولت بوتون موسلمانلارین خئیرینه خصوصی مولکیتی محدودلاشدیرا بیلر. دیگر طرفدن، اگر بئله ‌دیرسه، اوندا، قرآنین موافیق مدعالاری بورادا دا روحانیلر طرفیندن پوزولور. دئییلدیگی کیمی، خصوصی مولکیتین حجمی نه اینکی محدودلاشدیریلمیر، عکسینه، اولدوغو کیمی قالمیشدیر کی، بو دا برابرسیزلیگین تظاهروندن ساوایی بیر شئی دئییلدیر. برابرلیکدن دم وورولان بیر اؤلکه ‌ده حکم سوره‌ن دهشتلی، فاجعه‌لی بیر برابرسیزلیک گؤز قاباغیندادیر. گؤرونور، دین باشچیلارینین واختیکن «اسلام عدالتلی-قارداشلیق و برابرلیک جمعیتیدیر» پرینسیپیندن دم وورماسی جمعیت عضولرینی آلداتماق اوچون نؤوبتی ریاکارلیق ایمیش. هم ده دین خادیملری طرفیندن بئله عباره‌لی سؤزلرین ایشلدیلمه‌سی اونلارین اؤز اساس نیتینی حیاتا کئچیرمک امکانی یارادان حرکاتلارینی اؤرت- باسدیر ائتمک دئمکدیر. اونسوز دا خلق قارشیسیندا گؤزو کؤلگه‌لی اولان (خومئ­ینی باشدا اولماقلا) روحانیلر خلقین دقتینی اؤزلرینه جلب ائتمک اوچون بعضا عباره‌لی سؤزلر ایشلتمکدن ده چکینمیرلر. بئله کی، محافظه کار روحانیلر دینی قایدا- قانونلاری ائله قلمه وئرمه یه چالیشیرلار کی، گویا اسلامیتده مولکیت غیری محدوددور. (۳۰) موسلمان اولان هر کس باشقاسینین امگینین استثمار اولماسینا باخمایاراق، ایستدیگی قدر وار-دؤولته، مولکه، تورپاغا صاحب اولا بیلر. بو استثمارچی روحانیلرین دئدیگیندن بئله چیخیر کی، اسلام غیری- محدود مولکیتی و استثماری مشروع بیلیر و قانونی حساب ائدیر. اصلینده ایسه بو باشقاسینین حسابینا کلی میقداردا ثروت و تورپاغی زور گوجونه ضبط ائتمک ظالملارین آغالیغینا و آما‌سیز استثمارینا حق قازاندیرماق اوچون گؤستریلن خیدمتدیر.

لاکن بونو دا قید ائتمک لازیمدیر کی، عصرلر بویو تورپاقسیز و آزتورپاقلی اولان ایران کندلیسی اؤز حقینی طلب ائتمک اوزونه، دینی خرافاتین گوجلو تأثیریله موللالارین شریعت آدیندان ساختاکارلیقلا دوزلتدیکلری بعضا بئله بیر مدعایا اینانیرلار کی، گویا مولکیت توخونولمازدیر، اونو «بؤیوک الله» بنده‌لرینه بخش ائتمیشدیر، تورپاقسیز و آزتورپاقلی باشقاسینین تورپاغیندا گؤزو اولماسی، هر هانسی یوللا اله گتیرمک مئیلی قرآنین شریعتین و دینی قایدا- قانونلارین علیهیندیر، گویا الله انسانلاری امتحان ائتمک اوچون اؤزو – وارلی و یوخسوللاری یاراتمیشدیر. (۳۱) البته، بئله فیکیر و دوشونجه‌نین نتیجه‌سی اوندان عبارت‌دیر کی، وارلیلار داها وارلی اولار یوخسوللار داها دا یوخسوللاشار. البته، روحانیلرین ثروت آدیندان قونداردیقلاری بو کیمی فکرلر هئچ ده همیشه ‌لیک اؤزونه یئر توتا بیلمیر. بئله کی، اؤلکدن قاچمیش و عکس انقلابچیلارین کندلیلره وئریلمیش تورپاقلاری اونلارین اولکی صاحبلرینه قایتاریلماسی یئرلرده گئنیش زحمتکش کندلی کوتله ‌لرینین کسگین اعتراضلارینا سبب اولموشدور. حالبوکی، خومئ­ینی انقلاب عرفه‌ سینده و انقلاب دؤورونده بیلدیردی کی، تورپاق اونو اکنیندیر، الله یندیر. لاکن سونرالار او سؤزونو ده گیشدی و مولکدارلار یئنیدن «اؤز تورپاقلارینا» صاحب اولدولار. الله حاقیندا دئییلن سؤز ده آرادان گئتدی، وئریلن وعدلر ده. (۳۲)

کندلره قاییدان مولکدار و کاپیتال صاحبلرینین موقعینی محکه‌ملندیرمک مقصدیله حکومت طرفیندن مجلسه تقدیم ائدیلن ۵ ایللیک پروقرامدا گؤستریلیر کی، کند تصروفاتی بؤلمه‌سینده بوتون پروقرام مدتینده کاپیتال قویدوغو ۲۱۳۳ میلیارد رئال اولاجاقدیر. بو مبلغدن یالنیز ۷۹۵ میلیارد رئال دولت واسطه‌سیله کاپیتال قویولاجاقدیر قالان حیصه‌ سینی ۱۳۳۸ میلیارد رئال و ۶۲ فایزینی «غیری- دولتی- بؤلمه‌ نین» عهده‌سینه دوشور. (۳۳)

ادامه دارد

Go Back

Comment