header photo

آزادلیغی آلمایینجا

تاریئل اومید

ایرانلی مهاجرلر ادبی بیرلیینین صدری

آزادلیغی آلمایینجا

نئچه ایلدیر

اوفوقلر ده گولومسمز

بیر مملکت اوزرینده.

آزادلیغی،

سادتی او اؤلکه‌ نین

اولمایینجا اؤز الینده.

نئچه ایلدیر اسارتیم

تملینه

مبارزلر بالتا چالار.

ستتارخان تک حیاتلاری

عمللری نغمه اولار.

نئچه ایلدیر بیر مسلکدن،

بیر آرزودان

شاخه- شاخه آیریلیقلار

دوغولموشدور.

نئچه ایلدیر خالقیمیزین

سئوینجلری یاناقلاردا

دوداقلاردا بوغولموشدور.

محببت ده

آغ گونونو گزیر هله.

بیر مقاما بنددیر او دا،

اولدوز کیمی سپه ‌لنه.

سن ده بیل کی، عزیز وطن،

قارانلیقلار گؤزلریمی

باغلایانماز.

تاریخ بئله

زامان بئله

منیم ووران اللریمی

بیرجه آن دا ساخلایانماز!

عزیز وطن،

فتح ائدیلمز سنگر اولدون.

سن ووروشلار میدانیندا

سیپر اولدون.

بیر وولکانام-

بو دونیانلا باریشمارام.

آزادلیغی آلمایینجا،

آزادلیغین اولمایینجا،

اؤلسم، وطن،

تورپاغینا قاریشمارام.

 

منیم گلجه ییم اولاجاق

تانیش گدیکلرله اوز- اوزه دوردوم،

قلبیمی گؤورتدی چالینان بیر ساز.

آی دوغما تورپاغیم، آی دوغما یوردوم،

من سندن یاپیشیب دیکلدیم بیر آز.

 

خالقیما سؤیکنیب باخدیم ایره ‌لی

بوردا سالینمامیش کندلری گؤردوم.

چیل- چیراق ائده ‌جک زیل گئجه‌ لری-

چایلارین بوینوندا بندلری گؤردوم.

 

سئوینسین او گونش، او اولدوز، او آی،

گؤروم سادتده ائلین سسینی.

گلسین گؤروشونه قوناقلار قیش، یای،

شاعر نباتینین مقبره‌ سینین.

 

ائله آزادلیق دا گونش کیمیدیر،-

نورونو هر یئره سالاجاق یقین

بوردا شهر- شهر قالخیب اوجالان-

منیم گلجییم اولاجاق یقین.

 

عمرون چیچک قدر اولدو

۸۷ یاشلی ملئیکه آناما

اوره یینده اوغول داغی،

گؤزللیین هدر اولدو.

یازیق آنام، عزیز آنام،

«اعمرون چیچک قدر اولدو».

وطنینی ایتیرمیشدین،

قریبلییه اسیر دوشدون.

کولک کیمی اسیب کئچدین،

آیریلیغین بئتر اولدو.

داغیلساق دا بیز هر یانا،

خاتیرلاریق یانا- یانا،

پارچا- پارچا، شانا-شانا،

قایغین بیزه چپر اولدو.

اوریینده اوغول داغی،

گؤزللیین هدر اولدو.

یازیق آنام، عزیز آنام،

«عمرون چیچک قدر اولدو».

 

 

 

Go Back

Comment