header photo

٢١آذر نئهضتینیندن سونرا- ۱۹۴۵-۱۹۴۶- جی ایللرده

٢١آذر نئهضتینیندن سونرا- ۱۹۴۵-۱۹۴۶- جی ایللرده

قوروجولوق ایلینده‌

عصرلردن بری اؤز ملی آزادلیغی اوغروندا مبارزه آپاران آذربایجان خلقی اؤز ایستک و آرزوسونا نائل اولموش‌دو. آذربایجان خلقی شاهلیق اصول – اداره ‌سینه، داخلی و خارجی مورتعجیلره غالب گلیب، اؤلکه‌ ده اؤز ملی حاکمیتین باشیندا آذربایجانین گؤرکملی اوغلو و آذربایجان دمکرات پارتییاسینین رهبری سید جعفر پیشه وری دورموشدو.

آذربایجان خلقینین ایستکلی اوغلو اؤلکه‌ نی اقتصادی چتینلیکلردن، خلقی کئچمیشین کؤللییندن، ساوادسیزلیغیندان کئچمیشین عذاب- اذیتلریندن خلاص ائتمک اوچون اؤز اوزرینه بؤیوک ایشلر گؤتوردو.

آذربایجان خلقینین گؤرکملی اوغلو- پیشه وری یولداش، آذر نئهضتیندن سونراکی مراجعتلرینده خلقی بیرلییه پارتییانین اطرافیندا سیخ بیرلشمه ‌یه چاغیریردی.

آذربایجان خلقینین انکشافی اوچون، خلقین ملی حقوقونو تعمین ائتمک اوچون پارتییا علیندن گلنی ائدیردی. پارتییانین شعارلاریندان بیرینده:

۱- فعله ‌لره سکیز ساعتلیق ایش گونو، تورپاقسیز کندلیلره تورپاقلارین پایلانماسی.

۲- قادینلارا آزادلیق، قادین آزادلیغی، حقوق برابرلیگی، ساوادسیزلیغین بوتون اؤلکه‌ ده لغو ائدیلمه‌ سی شعارلاری اؤلکه‌نین هر طرفینه یاییلیردی.

بو شعارلارلا علاقدار خلقین ائتیمادینی قازانمیش پارتییانین سسینه سس وئره‌ن آذربایجانین قهرمان اوغوللاری اؤلکه‌ نین هر طرفینده اؤز سسلرینی اوجالتماغا باشلادیلار.

بو قوروجولوق ایلینده آذربایجانین بوتون کندلرینده اولدوغو کیمی بیزیم ده یاخین، اوزاق کندلریمیزده بؤیوک ایشلر گؤرولمه ‌یه باشلانمیشدی. ۲۱ آذر نئهضتی غلبه چالان واخت کندلریمیز ده اقتصادی انکشاف جهتدن ایرانین ان گئریده قالمیش کندلری ایله بیر سیرادا دورورموش آذربایجان ملی حکومتینین چاغریشینا قوشولان کندلریمیز کندلرین انکشافی اوچون جانلا- باشلا چالیشماغا باشلادیلار. بوتون اؤلکه‌ ده اولدوغو کیمی بیزیم ده کندلرده تورپاق‌سیز، آز تورپاقلا کندلیلره تورپاقلار پایلاندی. سوسوز تورپاقلارا سولار چکیلیردی. کندلریمیزده یئنی یوللار چکیلیر، سو بندلری سالینیر، یئنی آرخلار چکیلیر و تاخیل یئرلری، چؤللر، اؤروشلر داش- کسکدن تمیزله ‌نیردی. یئنی کهریزلر سالینیر. کؤهنه‌ لری تمیزلنیب، تزه ‌دن ایشه سالینیر. بعضی کئچیلمز چایلار آرخلار اوزرینده کؤرپولر سالییردی، کندلرده بؤیوک جانلانما وار ایدی. کندلیلرین اوزوندن – گؤزوندن بؤیوک انقلابی غلبه سئوینجی یاغیردی. گلن یاز اکینینه بؤیوک حاضرلیق ایشلری گؤرولوردو. کندلرده تشکیلاتی، تبلیغاتی، تشویقاتی ایشلر آپاریلیردی. بوتون اؤلکه‌ ده اولدوغو کیمی، آذربایجان دمکرات پارتی‌سی شهرلرده، کندلرده، قصبه ‌لرده، ویلیتلرده اؤز نفوذونو گؤسترمیشدی. پیله چایی محلی کئچمیشده اردبیله، نمینه تابع ائدیلدی. بو دؤورده پیله چایی کندلرینین حؤوزه‌لری حومه کومیته ‌سیندن نمین ویلایت کومیته‌سینه تابع ائدیل‌دی. کندلریمیزده پارتییا ایشلری لازیمی سوییه‌ ده ایدی. بو دؤورده کندلیلریمیزین پارتییا سیرالارینا چوخلو آخینی وار ایدی. هر کندین فرقه ‌چیلرین حؤوزه‌لری، ایلک پارتییا تشکیلاتلاری وار ایدی. یاخشی یادیمدادیر ۲۱ آذر نئهضتیندن بیر نئچه آی کئچممیشدی. پیله چایی حومه کومیته‌سی یارانمیشدی. بو واخت آتام ۱۲ کندین نظره‌لی، خوشاباد و هوشنه بیرلشمیش حؤوزه‌لرینین ایلک پارتییا تشکیلاتینین و عینی زاماندا پیله چایی حومه کومیته‌سینین مسئول ایشچیسی وظیفه‌سینده چالیشیردی. حؤوزه‌لرین عضولری آرتدیقجا حومه‌نین ایشی چوخالیردی. بیر مدتدن سونرا پارتییا عضولرینین سایی داها دا چوخالمیشدی. اودور کی، یوخاری اورقانلار بونو نظره آلاراق، پیله چایی حومه کومیته‌سینه یوخاریدان آدام گؤندرمه ‌لی اولدولار. یوخاریدان گؤندریلن ایرشادی پیله چایی حومه کومیته‌سینین صدری تعیین ائدیلدی. آذربایجان دمکرات پارتییاسینین مرکزی کومیته‌سی خالقلا ایشله ‌یرک، شهرلره، ویلایتلره اؤزونون اینانیلمیش آداملارینی تعیین ائدیردی. بو ارفه‌ده نمین ویلایتی کومیته‌سینین صدرلیینه تورنگی آقاکیشینی تعیین ائتمیشدیلر. آتام اوچون شهرلره کند آراسی مسافه داها دا یاخینشلاشمیشدی. باجی‌سی اوغلونون بو وظیفه ‌ده اولماسی اونو داها دا حرکته گتیرمیشدی. گیزلی آدلا یوخ، آقامی داسی آچیق آدلا ایش آپاریردی. آتام اؤز تصروفاتینین ایشلرینی بیزه تاپشیریب، فرقه تشکیلاتلاریندا قیزغین ایش آپاریردی. او، کندلرینین روحونو اله آلماقدا ماهیر ایدی. هر جور مبارزه اوچون دیندارلارلا دا دیل تاپا بیلیرتدی. کندلی کوتله ‌لری آراسیندا دا هر کندده حؤرمته مالیک ایدی. ایرشادی آتامین بو باجاریغینی گؤروب اوندان ال چکمزدی. خالقین ایچریسیندن چیخمیش بو باجاریقلی آداملار ال- اله وئریب کندلیلر آراسیندا چوخلو ایش آپاریردیلار. فرقه‌ نین بوتون تاپشیریغینی یئرینه یئتیرمه‌ یه چالیشیردیلار. کندلرده ده قادین آزادلیغینی قورویوردولار. ۲۱ آذر نئهضتیندن بیر قدر سونرا قادین آزادلیغی کندلرده، شهرلرده یاییلدی. آذربایجان قادینلار تشکیلاتینین یارانماسی قادینلارین بؤیوک سئوینجینه سبب اولدو. اوزون ایللردن بری اسارتده قالان، دینی عادتلرین قوربانی اولان، دؤرد دیوار آراسیندا قالان، مکتبه، علم و مدنیته بؤیوک احتیاجی اولان کند قادینلارینین قادینلار تشکیلاتینین یارانماسی ایله کندده، کندلریمیزده ده قادینلار تشکیلاتی یاراندی. پیله چایی حومه کومیته‌سینین کمگی ایله کندلرده قادینلار تشکیلاتی یاراندی. بو واخت کندیمیزده قادینلار تشکیلاتینا ۲۵ قادین عضو اولموشدو. هوشنه کند قادینلار تشکیلاتینین صدری برز‌ندی سورییا خانیم سئچیلدی. بیر چوخلاری دا اونون کؤمکچیلری اولدو: شاه‌صنم، شهربانو، روقییه و بیر چوخلاری بیری دیگریندن جسارتلی ایدیلر. ۲۰ مادده‌دن عبارت مرامنامه و نیزامنامه ‌لرینی دایم یئرینه یئتیرمه ‌یه جان آتیردیلار. آذربایجان‌دا قادینلاری ایر‌لی چکمک اوچون ملی حکومت داها یاخشی ایشلر گؤروردو. قادینلارا کیشیلرله گیزلی سس وئرمه‌ ده اشتراک ائتمک، سئچمه حقوقو، ساوادسیزلیغی لغو ائتمک، سکیز ساعتلیق ایش گونو و کیشیلرله حقوق برابرلیینه قدر وئریلمی‌دیر.

کریموو (داسی) صیاد آقامی اوغلو

۰۱.۰۵.۲۰۱۸-جی ایل      

Go Back

Comment