Select an Image

header photo

بوتون تشکیلاتچیلارا و ایشتیراکچیلارا ابراهیمیلر نسلینین تشکورونو بیلدیریرم

بوتون تشکیلاتچیلارا و ایشتیراکچیلارا

ابراهیمیلر نسلینین تشکورونو بیلدیریرم

نویابرین ٢٤- ده ساعت ١٢- ٠٠- دا بین الخلق مطبوعات مرکزینین ده­یرمی زالی فریدون­سئورلرین اختیارینا وئریله‌ جک. تدبیره اوچ گون قالسا دا ایندیدن اوغورونو، فعالیتیمیزین تکمیللشمه‌ سینه، یئنی چالارلارلا زنگینلشمه ­سینه یؤنه‌­لن تأثیر امکا‌لارینی گؤرور، ان اساسی فریدون ابراهیمی سیماسیندا تاریخی شخصیتلریمیزین او تایلی، بو تایلی وطنیمیزین ساکینلرینه داها یاخیندان تانیدیلماسی، نسیللره تبلیغی اوچون باشلادیغیمیز ایشلرین یئنی، کیفیت مرحله‌­سینه قدم قویاجاغینا  اینانیریق. بئله نتیجه­یه اؤنجه‌­دن گلمه­‌یه یوبیلئی تشکیلاتچیلارینین - آذربایجان دمکرات فرقه‌ سی مرکزی کمیته‌ سی و "ایرانلی مهاجرلر جمعیتی" اجتماعی بیرلی­گینین سون ایکی آیدا حاضرلیق چرچیوه‌­سینده نظرده توتولان بوتون تدبیرلری یوکسک سویه‌­ده یکونلاشدیرما‌لاری اساسلار وئریر.

بئله کی، منصفلر هیئتی آذربایجانین شهر و بؤلگه‌­لریندن، آوروپا اؤلکه‌ لریندن، ایراندان بین الخالق مسابقه‌­یه گؤندریلن یازیلاری اوخویا‌راق ان یاخشیلاری معینلشدیریب، آذربایجان علملر آکادمیاسینین ریاست هیئتینین قراری ایله فریدون ابراهیمینین ایکی کیتابی نشر اولونوب، "آذربایجان" روزنامه‌سینین، "مهاجیر" قزئتینین یوبیلئی سایلاری ایشیق اوزو گؤروب، اشتراکچیلارا دعوت نامه‌لر گؤندریلیب، دؤش نیشانی، تقویم و قلم حاضیرلانیب. تدبیرده معروضه و چیخیش ائده‌جک عالیملرین، تحقیقاتلارین دا آدلاری معلومدور.

بؤیوک هجملی ایشلرین قیسا مدتده کیفیتله ایجراسی عینی زاماندا فریدون ابراهیمی شخصیتینین اونودولمادیغینین تصدیقیدیر. بو منیم اوچون سون ‌سوز سئوینج، غرور منبعیدیر. آتام انوشیروان ابراهیمی قارداشینین عزیز خاطره‌­سینه احترام علامتی اولا‌راق اونون آدینی، سوی­آدینی منه وئریب. بو باخیمدان یوبیلئیی تدبیرینین بوتون تشکیلاتچیلارینا، ایشتیراکچی‌لارینا، یازی غالبلرینه، مؤلفلرینه نسلین تشکورلرینی یئتیرمک منه حواله ائدیلیب.

گؤزومو دنیایا آچاندان اؤیمیزده زنگین کتابخانا، قالاق- قالاق قزئتلر، ژورناللار گؤرموشم. آتام آغلیم کسندن بابامدان - غنی کیشیدن ده دانیشیب، اما عمیم باره ‌ده صحبتلری بیتیب-توکنمه­ییب. اوندا بیلمیشم کی، خالقیمیزین شرف سالنامه­‌سینی یارا‌دانلار سیراسیندا اولان بیر نسله منسوبام.

حقوقشناس پئشه­‌سینی سئچمه­گیمین سببی ده ایلک نؤوبه‌ ده والیدینلریم اولوب. اونلار منه فریدون ابراهیمینین نظرلری ایله باخیبلار. سونرا‌لار ادبیاتدان، فیلملردن بو ساحه ‌نین پئشه­کار، مرد، یئنیلمز اوبرازلاری ایله تانیش اولاندا گلجه­گیمی حقوقشناسلیقلا باغلاماغی قطعیلشدیرمیشم. باکی دولت اونیوئرسیتئتینی بیتیریب آذربایجانین پروکورورلوق اورقانلاریندا چالیشدیغیم ٣٧ ایلین هر گونونده ائله سانمیشام کی، فریدون و انوشیروان ابراهیمیلر باشیمین اوزه­رینده دایانیب نظارت ائدیرلر. اونلارا هر گون وجدانی حساباتیمی وئرمیشم. اؤتن مدتده نه واختسا رهبرلیک طرفیندن تنبیه اولونما، جزالاندیرما حاللاری ایله اوزلشمه­میشم. دفعه‌ لرله باش پروکورورلوغون تعریفنامه­لری، قیمتلی هدیه‌لری ایله مکافاتلاندیریلمیشام. بو سیستمده ان نفوذلو حساب ائدیلن آذربایجان رئسپوبلیکاسی پروکورورلوغو اورقانلارینین فخری امکداشی آدینا و دؤش نیشانینا لاییق گؤرولموشم. حاضردا تقاعده چیخدیغیم بیر واختدا داخیلن تسللی تاپیرام کی، من اونلارین روحو قارشیسیندا بورجلو قالمامیشام.

علاوه ائدیم کی، ف. ابراهیمینین یوبیلئیی آذربایجان رئسپوبلیکاسیندا پروکورورلوق اورقانلارینین یارانماسینین ١٠٠ ایللیگینه تصادف ائتمه ‌سینین اؤزو ده سیموولیک علامت ساییلما‌لیدیر. بو مناسبت ایله باش پروکورور ذاکر قارالوف طرفیندن منه تعریفنامه ده گؤندریلیب، اورادا خدمتلریم ایفاده‌­سینی تاپیب. 

بونلار اؤز یئرینده. یازیدان مقصدیم هئچ ده کیمه­سه حسابات وئرمک دئییل. ساده‌ جه فریدون ابراهیمی باره‌­ده مأخذلره، فیکرلره، سیتاتلارا استینا‌دن هر بیر آذربایجانلینین، حقوقشناسین اوندان نیه نمونه گؤتورجه­گینه قیساجا آیدینلیق گتیرمک ایسته­ییرم.

آذربایجان ملی حکومتی جمعی بیر ایل عمر سوروب. اما اونون بوتون شرق خلقلرینه هر ساحه­ده نمونه اولا بیله‌­جک قانونلار توپلوسو مضمونونا، دولغونلوغونا گؤره، ان اساسی جمعیتده یاشیندان، وظیفه‌سیندن، ملیتیندن آسیلی اولمایا‌راق هر بیر شخصین حقوق و دمکراتیک آزادلیقلارینی اساس گؤتورمه‌سی ایله یادداشلاردا قالیب. همین قانونلار اینسان منافعیینه، شرف و لیاقتینین قورونماسینا، رفاه حالینین یاخشیلاشدیریلماسینا، ایش و اجتماعی فایدا‌لی زحمتین تأمیناتینا، وط‌نین اقتصادی ترققی‌سینه یؤنه‌لن هر جور خصوصی ملکیت حقوقونون مدافعه‌سینه استقامتله­نمیشدی.

ملی حکومتین جیلد-جیلد حقوقی بازاسی هم ده سید جعفر پیشه­رینین رهبرلیگی آلتیندا چالیشانلارین، خصوصیله حقوقشناسلارین بونلاری حاصیله گتیرمک اوچون نئجه هوسله، گرگین ایشله­دیکلرینی، بوتون بیلیک و باجاریقلارینی یئنی جمعیتین انکشافینا، محکملندیریلمه­سینه صرف ائتدیکلرینی گؤسترمکده‌دیر.

ف. ابراهیمی ”آذربایجان" قزئتینده یازیردی کی، بیز هامیمیز آذربایجان ملی حکومتینین یئنی دورده بیزیم اوچون یاراتمیش اولدوغو یئنی اجتماعی، اقتصادی، سیاسی شرایط‌دن لیاقتله استفاده ائدیب، اؤز باجاریغیمیزی نیشان وئرمه­لیگیک. بوندان سونرا قانونو پوزان و خالقین حقوقونا تجاووز ائدن هر بیر شخص ان آغیر و رحمسیز صورتده جزا‌لانا‌جاقدیر...

ف. ابراهیمی اؤزو زنداندا اولارکن یوزلرله گناهسیز اینسانین آمانسیزجاسینا جزالاندیریلدیغینی گؤرموشدو. اؤزونو مدافعه ائدن محبوسلارین ١٠٠ نفریندن چوخونون دؤرد ایل عرضینده محکمه قراری اولما‌دان حبسده قالدیغینی مشاهده ائتمیشدی. ملی حکومتین باش پروکورورو تعیین ائدیلن کیمی اونلارین هامیسی آزادلیغا چیخدی. بئله‌­لیکله ده بوتون یاغلی وعدلری رد ائده­رک قانونون و شخصیتینین عالیلیگینی ایانی صورتده گؤسترمیشدی.

او وقت اکثریتین گومانینا بئله گلمزدی کی، دؤردونجو اوستانین باشچیسی، اورمیه‌ ده­کی قوشون حیسه‌­سینین کوماندیری، کسدیگی باشلارا گؤره هئچ وقت سورغو-سوالا توتولمایان پولکوونیک احمد زنگنه باره‌ده کیمسه اؤلوم حؤکمو چیخارماغا جسارت ائده بیلر. باش پروکورور ایسه جانی‌نین خواهیشینه گلنلره سرت شکیلده بیلدیرمیشدی کی، آغیر سلاحلار، تانکلار واسطه‌سیله قوجا‌لاری، اوشاقلاری، الیالین اینسان‌لاری آمان‌سیزجاسینا اؤلدورن بیریسی‌نین حیاتدا یاشاماغا حاقی یوخدور. "چونکی بیز خالقین طالعیی ایله محتکیرلیک ائدن آلیش-وئریشچی‌لر دئییلیک، اونون آزادلیغی یولوندا مبارزه‌یه قالخمیش سربازلاریق. اؤلوم بیزی قورخوتمور."

بلی، او، آذربایجان ملی مجلیسینین و ملی حکومتینین خالقین مالینی، جانینی، امنیتینی، آزادلیغینی خالق دوشمنلریندن قورویوب ساخلاماق حاقینداکی عدالتلی قانون‌لارین حقیقی مدافعه‌چیسی ایدی.

فریدون ابراهیمی،

"ایرانلی مهاجرلر جمعیتی اجتماعی بیرلیگی"

صدری‌نین بیرینجی معاوینی

Go Back

Comment