header photo

۲۱ آذر حرکاتينين ايل دونومو مناسبتيله تشکيل اولان ييغينجاغين بياناتی

۲۱ آذر حرکاتينين ايل دونومو مناسبتيله تشکيل اولان ييغينجاغين بياناتی

 آذربايجان خالقی مشروطه انقلابيندان سونرا ٢-جی دفعه آياغا قالخدی. آذربايجاندا مختار بیر ملی حکومت ياراندی. بو حکومت بیر ايل عرضينده بؤيوک سياسی، اجتماعی و اقتصادی اصلاحاتلار حیاتا کئچیردی. ايران تاريخينده بو اصلاحاتلار ايلک دفعه حياتا کئچيريلن اصلاحاتلار ايدی. بو دؤور آذربايجانين ملی ديلی رسمی ديله چئوريلدی. ابتداعی مکتبدن باشلاياراق عالی مکتبه قدر تحصيل آذربايجان ديلينده آپاريلدی. دولت اداره لرينده آذربايجان ديلی ايشله­مه­يه باشلادیآذربايجاندا ايلک دفعه اولاراق دولت اونيورسيتئتی ياراندی. دولت تئاطری و دولت فلارمونياسی ايشه باشلادی. ايلک دفعه اولاراق آذربايجان کندليسی پولسوز تورپاق پايی آلدی. يئنی طب مرکزلری آچيلدی. کيمسه سيز اوشاقلاری حمايه دارليغا گؤتورن خيريه مرکزلری ياراندی. شهرلرين آبادلاشديريلماسی و کوچه لرين دوشه مه سينين ده ييشديريلمه سی ساحه سينده گئنيش مقياسلی ايش آپاريلدی. آذربايجاندا امين-آمانليق حکم سوردو.

بو اصلاحاتلار ائله بير شرايطده آپاريلدی کی، تهران حکومتی آذربايجانی محاصره يه آلميشدی. سرحد بويونجا يئرلشن اراضيلرده شاه قوشونلاری و فئودال خانلارين سلاحلی دسته لری فدائی دسته لرينه قارشی آراسی کسيلمز سلاحلی عمليات حیاتا کئچيريرديلر. بوتون بو پروواکاسيايا باخماياراق آذربايجان الده ائتديی نائليتلری باجاريقلا قورويوردو. آذربايجان يئنه ده ايراندا آزادليق، دمکراتيا، ملی مستقللیک اوغروندا گئدن مبارزه نين اؤن سنگرينه چئوريلميشدی. ظلم و اسارت آلتيندا ياشايان خالقلار آذربايجانا اميد بسله ييرديلر. ايرانين مترقی ضياليلاری آذربايجانا مراجعت ائديرديلر کی، تهرانين آزاد ائديلمه سی اوچون تدبير گؤرسون. همين ضياليلار س.ج.پيشه ورينی، پاديگانی، شبسترينی مترقی وطن پرور شخصيت کيمی قيمتلنديريرديلر. س.ج.پيشه ورينين باشچيليق ائتديی نماينده هئيتينين تهرانا گلمه سی بؤيوک بير بايراما چئريلدی. مينلرله شهر اهاليسی طياره ميدانينا آخيشديلار و آذربايجان نماينده هئيتينی  "گلين بيزه ده نجات وئرين" شعاری ايله قارشيلاديلار. تهران دوغرودان دا هر شئيه حاضر ايدی. لاکن ٢-جی دنيا محاربه سيندن سونرا باش وئرن حادثه لر ايرانين، عموميتله شرق اؤلکه لرينين آزادليغا چيخماسی امکانينی آرادان آپاردی. ستارخانين رهبرليک ائتديی آذربايجان مشروطه انقلابينی اميرخيز کوچه سيندن باشلاياراق تبريزه يايدی. تبريز ايسه مشروطه انقلابينی بوتون ايرانا قايتاردی. ٤٠ ايلدن سونرا همين حادثه تکرار اولوندو. لاکن آذربايجاندان باشلانان آزادليغين ايرانا يايلماسينين قارشيسی آليندی. آذربايجان يئنه ده مرتجع قوه لرين جوولانگاهينا چئوريلدی. همين تاريخدن ٧۴ ايل کئچير. بو دؤورده ايراندا انقلابی مبارزه ائنيشلی – يوخوشلو يول کئچدی. ۱٣۵٧-جی ایلده باش وئرن ۲۲ بهمن انقلابینین نتیجه سی اولاراق شاهليق اصول اداره سی لغو ايديلدی. يئنی انقلابی حکومت ايش باشينا گلدی. خالقين الی ايله حاکميته گلن سياسی قوه لر يئنی دن آزادليق و دمکراتيانی بوغان قوه يه چئويرديلر. خالق يئنه ده قانلی ديکتاتورا ايله اوزلشدی. لاکن اونا تسليم اولمادی. دنيا مقياسيندا تجريد اولان حاکميت عينی زماندا ايران خالقلاری طرفيندن دن ده تجريده معروض قالدی بو گون آزادليق و دمکراتيا گونون شعارينا چئوريلميشدير. خالقلار اؤز ملی حقوقلارينی الده ائتمک اوچون گئنيش مقياسلی مبارزه يه قوشولموشلار. بو مبارزه ده اهالينين بوتون صنف و طبقه لرينی اؤزونده بيرلشديرير. حاکم دايره لر زور ايشلتمک يولو ايله اؤز وارليغينی قوروماغا چاليشير. بو یاخینلاردا بنزینین قیمتینین ایکی قات آرتماسی ایله ایران اهالیسینین اکثریتی اؤز اعتراضینی بیلدیرمک اوچون کوچه لره آخیشدیلار. رژیم بو دفعه ده قدارجاسینا اهالینین اعتراضینی یاتیریب بو فاجعه وی حادثه اه بیر چوخ انسان حیاتینی ایتریب وهمچنین قولدور مأمورلار واسیطه سی ایله بیر چوخ بانک و مغازه لره زیان ده یدی. مینلرله انسان حبس ائدیلدی.  دونیا اجتماعیتی بو دهشتلی حادثه نی قیناییب پيسله دی و بئله لیکله ده رژیمین تجريد دايره سی داها دا گئنيشلندی.

 آذربایجان دمکرات فرقه سی رژیمین بو وحشی داورانیشینی محکوم ائدرک، ييغينجاق اشتراکچيلارینا و ها بئله ایران  و  خصوصی ایله آذربایجانین خالقینا مراجعت ائدير و اينانير کی، ٢١ آذر حرکاتينين غلبه سی ايله باشلانان مبارزه داها دا درينله شجک، آزادليق و دمکراتيا بوتون ايراندا برقرار ائديله جک.

آذربایجان دمکرات فرقه سی مرکزی کمیته سی

۰۲۱آذر۱٣٩۸۰

Go Back

Comment