header photo

یولداش واله قلی زاده وفات ائتدی

یولداش واله قلی زاده وفات ائتدی

  چوخ افسوس لارلا یولداش واله قلی زاده، آذربایجان دمکرات فرقه سی مرکزی کمیته سینین صدری، چهارشنبه گونو، 23 مرداد 1398 تاریخینده، 81 یاشیندا وفات اتمیشدیر. بِله لیک له، ایرانین میللی انقلابچی خالق حرکات لاری اؤز محکم و ایناملی و اعتیبارلی اوغوللاریندان داها بیریسینی دَه ایتیردی.

  یولداش واله قلی زاده رضا اوغلو 21 اردیبهشت 1317 تاریخینده اردبیل ولایتین «خوروزلو» کندین ده اکینچی بیر عایله ده دؤنیایا گوز آچمیشدی. اونون آتاسی رضا قلی زاده حضی اوغلو 1324 جی ایلده آذربایجان دمکرات فرقه سینین سیرالارینا قوشولوب و بوتون اؤز ایمکان لاری و گؤجونؤ انقلابی مباریزه یه حصر ائتمیشدیر.

   1325 جی ایلین آذر آیندا، شاهنشاهین داخلی و خارجی ارتجاعی متفق قوشون لاری طرفیندن «21 آذر» حرکاتی علیهینه هجوم اولاندا، قلی زاده لرین  کند ده کی اولری ده هجوما معروض قالدی. آتاسی توتولوب و نامعلوم یره گوندریلدی، یاخین قوحوم لاری آناسی و باجیلارینی گیزلتدیلر، اِولری وحشی مامورلار طرفیندن اؤچؤرؤلدی. دهشتلی قارلی بوزلو سویوق گجه ده، واله قلی زاده و بالاجا قارداش لاری مجبور قالدیلار کی گِری قایدیب، قاپی پنجره سی سینمیش اطاق لارین بیری سینده گیزلنسینلر. آنجاق سحر واقتی، واله باشا دؤشؤر کی هر ایککی قارداشلاری دونوب و هلاک اولوب لار.

  بو حادثه دن سونرا، واله قلی زاده  اله همین آز یاشلی گنج ایل لردن آتاسینین یولونو داوام ائتمه یه باشلادی. واله «هامار کند» تشکیلات صدری صفربابا بندی ایله گیزلی تشکیلاتی ایشلرده امکداشلیقا باشلایر. واله صفربابا نین گوستریشی ایله، اردبیل ماحالین شدتلی سویوق و قارلی هاواسیندا، فرقه فدائیلرینی آیری آیری گیزلی استقامتلرده مشایعت ائدیردی و سونرادان آت لاری کنده قایتاریردی.

  3 ایل ایشکنجه لر و اذیت لره معروض قالاندان سونرا، نهایت کی واله ین آتاسی وحشی مامورلارین الیندن قاچماقی باجاریر و عائله سی ایله بیرلیکده 1328 جی ایلین آذر آیندا سوسیالیست شوروی آذربایجان اؤلکه سینه مهاجرت ائدیر.

  واله قلی زاده شوروی اؤلکه سینده تحصیل آلیر و 1342 جی ایلده عالی تحصیلاتی بیتیردیکدن سونرا، اکینچیلیک ساحه سینده باش مهندس کیمی ایشه قبول اولونور.

  یولداش واله قلی زاده  اله  دانشجو لوق  واقتیندان اجتماعی، سیاسی و تشکیلاتی ایشلرده چوخ فعال اشتراک ائدیر. بله لیک له ، 1342- جی ایلده آذربایجان دمکرات فرقه سی قوبا شهر کمیته سینده تبلیغات شعبه سینین مسئولی تعیین اولوندو. همچنین، قیسسا مدت ساعاتلی، صابرآباد و علی بایراملی(شیروان) شهرلرینده ایشله یندن سونرا، 1343 جی ایلین مرداد آیندا، آذربایجان دمکرات فرقه سی شیروان شهرین جوانلار تشکیلاتینا صدر کیمی سچیلدی.

   1350-1354 ایللرینده، یولداش واله قلی زاده شوروی کمونیست حزبین آموزشگاهِ عالی سینی موفقیت له باشا چاتدیردی.

  یولداش واله قلی زاده 1358 جی ایلدن منتظم شکیل ده آذربایجان دمکرات فرقه سینین بتؤن پلنوم لاریندا اشتراکی اولوب، 1361 جی ایلده آذربایجان دمکرات فرقه سی شیروان تشکیلاتین صدر مسئولیتینه سچیلیر، همین ایلده، عینی واقت دا، رسمی اولاراق، آذربایجان دمکرات فرقه سی مرکزی کمیته سینه قبول اولونور. یولداش قلی زاده 1364 جی ایلده حزب توده ایرانین میللی کنفرانسین دا اشتراک اتمک اؤچون سچیلیر و 3 آی افغانستان دا فعالیت گؤستریر، 1367 جی ایلده آذربایجان دمکرات فرقه سینین اجرائیه هیاتینه سچیلیر.

  آذربایجان دمکرات فرقه سینین کچمیش صدری یولداش امیرعلی لاهرودی وفات ائتدیکدن سونرا، 9 اسفند 1393 جی تاریخینده، مرکزی کمیته نین فوق العاده پلنومی کچیریلدی. پلنوم دا هامی بیر سس له یولداش واله قلی زاده نی آذربایجان دمکرات فرقه سی مرکزی کمیته سینین صدری سچدیلر.

  یولداش قلی زاده بو آغیر و حساس وظیفه نی، محکم اینام لا، سوُن آنا قدر چینینده داشی یردی. یولداش واله قلی زاده ایران خالق لاری و خصوصی اولاراق آذربایجان خالقین آزادلیق و میللی حقوق لار اوغروندا آپاران مبارزه نی بؤیؤک غلبه امیدی ایله گوزله یردی.

  آذربایجان دمکرات فرقه سی مرکزی کمیته سی یولداش واله قلی زاده نین وفاتی مناسیبتی ایله اونون عایله سی، قوهوم لاری، فرقه نین بتون عضولری و طرفدار لاری، بتون مترقی و آزادلیق ایستین قوه لره صمیم قلب دن باش ساقلیقی وریر.

  آذربایجان دمکرات فرقه سی مرکزی کمیته سی

  24مرداد 1398     

 

Go Back

Comment