یئنه فضولی ایله باشباشا
سوسن نواده رضی
فضولی:
گریبان اولدی رسوالیق الی‌له چاک، دامن هم
منه رسوالیغیم‌دا دوست‌لار طعن ائتدی، دشمن هم
ره عشق ایچره جان قیلدیم گرفتار بلا، تن هم
بو یئتمزمی‌کی بیـــر درد آرتیریرسان دردیمه سن هم؟!
رضی:
بو دونیانین داشین بیر تورلو باشدان آتمادین، من هم
نه عهدینده، نه قوولوندا وفا سن ائتمه‌دین، من هم
محبت یول‌لارین چیزدین، ولی سن گئتمه‌دین من هم
اوساندیردین! بو لذت ذؤوقونه سن یئتمه‌دین، من هم
فضولی:
اگر توتسام غمیم ائل‌دن نهـــان، صبر و قراریم یوخ
وگر شرح غم پنهانیم ائتسم، غمـگساریم یوخ
اسیـــر بند زندانم، الیم‌ده اختیاریم یوخ
بو یئتمزمی‌کی بیر درد آرتیریرسان دردیمه سن هم؟
رضی:
اورکده درد درد اوسته گلیب آوار اولار اما
یاشام باشدان باشا غم اوستونه غملر قالار اما
سئویلمک نشئه‌سی جان اوستونه جانلار جالار، اما
اوساندیردین! بو لذت ذؤوقونه سن یئتمه‌دین، من هم…
